اهلاً بالجميع.. إليكم قصة من قصصنا الملهمة كما ترويها أم حوراء..

---

قصــــة حوراء

السلام عليكم ورحمة الله وبركاته .. الحمدلله أول ماولدت حوراء حطّوها لي في الشيشة لانه كان تنفسها صعب اشويه كانت الدكتوره تقلّب فيها كأنه فيها شي وسألتني عدة أسئله كم عمرك وكم واحد عندك كذا سؤال بس ماحسيت انها من الداون ابدااا .. وانا عندما كنت حامل كان واضح معها توسع بالكلى .. والدكتوره الي كنت اتابع معاها أثناء الحمل طمنتني وقالت عادي أول ماتولدي بنعطيها مضاد, وبتكون أمورها طبيعية. بعد الولاده , كانت الصدمه لي ولزوجي ! أخذوها من عندي وكل مااسأل عنها قالو لي بخير معاها دكتورة الأطفال ، بس انتي ارتاحي لانك تعبتي أثناء الولادة وماقالوا لي أن زوجي كان ينتظرني برا ، استدعته الدكتوره وقالت له بنتك من متلازمه الدوان ..

أول ماسمع الخبر قعد يصيح وقال ما ابغاها !! طبعا اتكلم من أول ماجبتها ، طبعا قال لي بالخبر وانا ما كنت ادري عنها وافتكرت اخذوها علشان توسع الكلى أبدا ماتوقعت انها من متلازمه داون وأول مادريت ماعرفت أيش أقول وماعرف مشاعري أصيح , أسكت شعور مااقدر أوصفه مهما أوصف كان يوم جداً صعب علي💔 .

ويوم كانت في الشيشه مارحت لها كنت خايفه منها .. طلعت من المستشفى ظلت عندهم لانه كان معها أبو صفار مارحت لها حتى ماعطيتها حليب من عندي .. وآسفاه ليت هالشي يرجع واعوضها عن كل شي بس مو بيدي يوم رخصوها اخذتها وحملتها حسيت بإحساس أول مره بحياتي كأنها أول مولوده لي قعدت أصيح والوم نفسي لاني تركتها في الشيشه مارحت لها ... اهلي الحمدلله الكل وقف وياااي في هالظروف ماتركوني️ حورائي الآن .. هي حياتي الله يخليها لي ويحفظها صدق هي أكبر نعمة وأكبر هدية لي ️💖